Nils Golberg Mulvik.

Bondesonen frå Ålvundfjord har ein sterk karriere på dei skrå breidder, som skodespelar ved blant anna Det Norske Teatret og Nationaltheatret. No har han blitt frilansar, og debuterer som regissør med «Spelet om Mardøla». Hit kjem Nils direkte frå rolla som Peer Gynt i den store oppsettinga i Fjæreheia utanfor Grimstad.

Emma Torine Ulateig Austigard

Emma Torine begynner i femte klasse på Eresfjord barne- og ungdomsskule i haust. Ho har ei viktig rolle i spelet som veslesøster Kari. Heime på garden i Eikesdal har Emma Torine utsikt rett opp i Sandgrovskardet der alt hendte for 52 år sia. Ho har vore med i ulike skuleframsyningar og sist i dramatiseringa av Mardølaaksjonen på juleavslutninga i 2021.

Odd Arne Halaas

Artigkaren frå Eide seier sjølv han er «fri som fanten»; trekkspelar, songar, humorist og skodespelar. Den prisbelønte trekkspelaren og folkekjære underhaldaren har brei erfaring frå mange teaterscener, også i profesjonelle oppsettingar. I «Spelet om Mardøla» er han eikesdalingen Peder; bonde, aksjonist og far som står sentralt i handlinga.

Olav Kåre Torjuul

Bonden og maskinføraren har lang erfaring som humorist, revyartist og skodespelar, og sette preg på amatørteatermiljøet i Eresfjord i mange år. Olav Kåre vart kjent med Odd Arne Halaas da begge spela i «Amerikaklokkå». Sia har dei to samarbeidd mykje, men i «Spelet om Mardøla» blir det konflikt. Der er Olav Kåre maskinentreprenøren Kjell frå Rauma.

Karianna Sommerro

Skodespelaren og songaren frå Trondheim har solide slektsrøter i Eresfjord og rik erfaring med sterke kvinneroller, som An-Magritt og Karen Lønseth. Karianna har særleg markert seg i ei rad kjente musikalar, no sist «Bør Børson». I kveldens stykke møter vi henne som Tone, odelsjente med bein i nasen, dotter av Peder.

Marit Synnøve Berg

Her i distriktet er Marit Synnøve særleg kjent for sine ti år som Lady Arbuthnott, men skodespelaren frå Stavanger har gjort ei lang rekkje store roller på teater, i film og i TV-seriar. Ho kan slå naturleg over på kva dialekt som helst, noko publikum får høyre når Marit Synnøve tolkar rolla som Bæste i «Spelet om Mardøla».

Mathias Melsæter Rydjord

Ein av karakterane i «Spelet om Mardøla» hamnar i ei skikkeleg klemme. Tore frå Rauma blir dregen mellom lojaliteten til far Kjell og kjærleiken til Tone. Den krevande rolla blir tolka av Mathias Melsæter Rydjord, skodespelar frå Kleive som òg driv Lyng Kulturgård i Verdal saman med sambuaren Helga Haga.

Gunnar Børset

Bonden og fagforeiningsmannen frå Ålvundeidet gjer comeback på scena i rolla som økofilosofen Sigmund Kvaløy. Gunnar har i mange år vore aktiv i JazzåTeatret og Lady Arbuthnott, men da som styremedlem og bakspelar. No tek han steget ut i rampelyset igjen, som Mardølaaksjonens «far».

Lars Ramsøy-Halle og Svein Sæter

Opphavsmennene

«Spelet om Mardøla» er den andre heilaftans musikalen Lars Ramsøy-Halle (musikk) og Svein Sæter (tekst) skriv saman i løpet av fire år. Sist var det «Stjernestøv», inspirert av menn og  kvinner frå Nesset, Sunndal og Surnadal i dei store gullrusha til Klondike og Nome. På sett og vis handlar det om gull denne gongen også; vasskrafta vart omtala som Norges kvite gull. Derfor var det også sterke krefter som pressa på for utbygging.

Begge opphavsmennene har ei lang merittliste. Lars er kjent som komponisten bak «Lady Arbuthnott», men har òg skrive mykje annan musikk for teater. Svein er forfattar av mange bøker, særleg innan historie. I tillegg har han lenge skrive songtekster og teaterstykke. Begge voks opp på Sunndalsøra, industriplassen som vart skapt av Aurautbygginga. Der bur Lars enno, mens Svein held til på småbruket i Stangvika

 

André Gussiås og Øystein Sandbukt

Mardøla-orkesteret: André Gussiås og Øystein Sandbukt møttest på musikklinja på Atlanten vidaregåande skole. Godt og vel 30 år seinare samarbeider dei om den musikalske leiinga under «Spelet om Mardøla». I mellomtida har begge markert seg sterkt i musikklivet; Øystein med gitaren og diverse strengeinstrument, André på piano og alt med tangentar.

I arbeidet med stykket har André vore repetitør på øvingane, han har laga fleirstemmige korarrangement og generelt hatt ansvaret for det som skal syngast. Øystein har jobba med det musikalske uttrykket i orkesteret, og i tillegg komponert musikk til eit par scener med dans.

I orkesteret på Mardalsbøen har André Gussiås og Øystein Sandbukt med seg fire andre musikarar av høg klasse: Britt Elise Skram (fele), Jo Inge Nes (trommer), Einar Kjensmo Fuglerud (gitar) og Ivar Sandbukt, bror av Øystein, på bass. 

Carsten Andersen

Scenografen og animatøren frå Stangvika har vore tilsett ved ei rekkje ulike teater, som Teatret Vårt, Riksteatret og Hålogaland teater. Tilbake i heimbygda har han vorte ein viktig fagmann for ei rekkje lokale arrangørar, ikkje minst JazzåTeatret. Carsten var med på å diskutere «Spelet om Mardøla» heilt frå dei første planane begynte å ta form.

Hege Lauritzen

Snøbrettkjøraren frå Oppdal har vore danselærar ved Sunndal kulturskole i nesten 20 år. Samtidig har ho vore utøvande dansar, instruktør, koreograf med meir for ei lang rekkje sceneoppsettingar. Neste stopp er filmskodespelarlinja ved Nordmøre folkehøgskule, men før det vil koreograf Hege sørgje for at dansen går på Mardalsbøen.

Agnethe Tellefsen

Lysdesigneren for oppsettinga har allsidig bakgrunn frå teater og scene, både når det gjeld arbeidsområde og arbeidsstad. Agnethe er også utdanna scenograf. Mens ho budde i Madrid designa ho lys for mange kjente spanske artistar og deltok på turnear verda rundt. I 2015 flytta ho heim til Norge, og har blant anna hatt ei rekkje oppdrag for Nationaltheatret.